ਮੁੱਖ ਪੰਨਾ ਸਾਡੇ ਬਾਰੇ ਸਾਡਾ ਪਤਾ ਫੌਂਟਸ ਹੋਰ ਸੰਪਰਕ

ਮੁਕੇਸ਼ ਕੁਮਾਰ ਡੇਵਟ

ਕਰ ਲਉ ਖੂਬ ਪੜ੍ਹਾਈ

ਕਰ ਲਉ ਖੂਬ ਪੜ੍ਹਾਈ ਬੱਚਿਉ,

ਆਜ਼ਾਦੀ ਦੀ ਦੂਸਰੀ ਲੜਾਈ ਬੱਚਿਉ ।

ਕਦੇ ਵੀ ਕਲਾਸ ਵਿਚ ਰੌਲਾ ਪਾਉਣਾ ਨਹੀਂ,

ਰੌਲਾ ਪਾ ਕੇ ਮੈਡਮ ਨੂੰ ਤੁਸੀਂ ਸਤਾਉਣਾ ਨਹੀ ।

ਅਨਪੜ੍ਹ ਤਾਂ ਰਹਿ ਜਾਂਦੇ ਸ਼ਦਾਈ ਬੱਚਿਉ,

ਕਰ ਲਉ ਖੂਬ ਪੜ੍ਹਾਈ ਬੱਚਿਉ ।

ਜਿਹੜੇ ਬੱਚੇ ਖੂਬ ਨੇ ਪੜ੍ਹਾਈ ਕਰਦੇ,

ਜਿੰਦਗੀ ‘ਚ ਉਹੀ ਨੇ ਤਰੱਕੀ ਕਰਦੇ।

ਜੋਰ ਲਾ ਕੇ ਚੜ੍ਹ ਲਉ ਚੜ੍ਹਾਈ ਬੱਚਿਉ,

ਕਰ ਲਉ ਖੂਬ ਪੜ੍ਹਾਈ ਬੱਚਿਉ ।

ਜਿਹੜੇ ਬੱਚੇ ਕਦੇ ਵੀ ਨਹੀਂ ਹਨ ਪੜ੍ਹਦੇ,

ਰੋਟੀ ਲਈ ਫਿਰ ਮਜ਼ਦੂਰੀ ਕਰਦੇ ।

ਆਉਦੀ ਨਹੀਂ ਘਰ ‘ਚ ਕਮਾਈ ਬੱਚਿਉ ,

ਕਰ ਲਉ ਖੂਬ ਪੜ੍ਹਾਈ ਬੱਚਿਉ ।

ਜਿਹੜੇ ਬਂਚੇ ਖੂਬ ਨੇ ਪੜ੍ਹਾਈ ਕਰਦੇ,

ਬਾਕੀ ਜਿੰਦਗੀ ‘ਚ ਫਿਰ ਐਸ਼ ਕਰਦੇ ।

ਆਉਂਦੀ ਖੂਬ ਘਰ ‘ਚ ਕਮਾਈ ਬੱਚਿਉ,

ਕਰ ਲਉ ਖੂਬ ਪੜ੍ਹਾਈ ਬੱਚਿਉ ।

ਵਣ ਮਹਾਂ

ਜੁਲਾਈ ਮਹੀਨੇ ਵਣ ਮਹਾਂ ਉਤਸਵ ਮਨਾਉ,
ਸਾਰੇ ਮਿਲ ਕੇ ਪੌਦੇ ਲਾਉ ।

ਬੋਹੜ, ਪਿੱਪਲ ਦੇਵੇ ਛਾਂ ਪਿਆਰੀ,
ਸੂਰਜ ਦੀ ਧੁੱਪ, ਖਾ ਜਾਏ ਸਾਰੀ ।

ਨਿੰਮ, ਧਰੇਕ ਘਰ ਦਾ ਵੈਦ ਕਹਾਵੇ,
ਫੋੜੇ, ਫਿਨਸੀ ਜੜੋਂ ਮਿਟਾਵੇ ।

ਅੰਬ ਦਾ ਬੂਟਾ, ਜ਼ਰੂਰ ਲਗਾਉ,
ਜੈਮ ਤੇ ਚਟਨੀ,ਰੱਜ-ਰੱਜ ਖਾਉ ।

ਨਿੰਬੂ ਦਾ ਬੂਟਾ, ਜੋ ਲਗਾਵੇ,
ਬਿਮਾਰੀ ਉਹਦੇ,ਪਾਸ ਨਾਂ ਆਵੇ ।

ਜਾਮਣ ਦਾ ਰੁੱਖ, ਬੜਾ ਹੀ ਚੰਗਾ,
ਮਧੂਮੇਯ ਦੇ ਨਾਲ, ਲੈ ਲਏ ਪੰਗਾ ।

ਅਮਰੂਦ ਦਾ ਬੂਟਾ, ਲਾਉ ਜਰੂਰ,
ਵਿਟਾਮਿਨ ਸੀ ਨਾਲ, ਹੈ ਭਰਪੂਰ ।

ਪ੍ਰਾਣ ਵਾਯੂ ਸਾਨੂੰ, ਸੱਭ ਰੁੱਖ ਦਿੰਦੇ,
ਕਾਰਬਨਡਾਈਆਕਸਾਈਡ, ਆਪ ਲੈ ਲੈਂਦੇ ।

ਕੁੱਲੀ, ਗੁੱਲੀ, ਜੁੱਲੀ ਦੀ ਲੋੜ, ਕਰਦੇ ਪੂਰੀ,
ਰੁੱਖ ਲਗਾਉ, ਚਾਹੇ ਇੱਕ ਜਰੂਰੀ ।

ਮਨੁੱਖ ਦੇ ਹਨ ਇਹ, ਪੱਕੇ ਸਾਥੀ,
ਜੋ ਇਹਨੂੰ ਵੱਢੇ, ਉਹ ਹੈ ਪਾਪੀ ।

ਬਚ ਲਉ ਠੇਕੇਦਾਰਾਂ ਤੋਂ

ਬਚ ਲਉ ਠੇਕੇਦਾਰਾਂ ਤੋਂ, ਇਹਨਾਂ ਨੇਂ ਬੜੀ ਹੈ ਲੁੱਟ ਮਚਾਈ,
ਇਹਨਾਂ ਨੇ ਸ਼ਰਮ ਲਾਹ ਦਿੱਤੀ, ਮਿਹਨਤਕਸ਼ ਦੀ ਖਾਣ ਕਮਾਈ ।

ਟੈਕਸ ਚੋਰੀ ਕਰਦੇ ਨੇ, ਸੁਪਰ ਨੂੰ ਵੀ ਹਜ਼ਮ ਕਰ ਲੈਂਦੇ,
ਮੇਹਨਤਕਸ਼ ਦਾ ਖੁਨ ਪੀ ਕੇ, ਆਲੀਸ਼ਾਨ ਘਰਾਂ ਵਿੱਚ ।
ਤਰਸ ਕਿਸੇ ਤੇ ਕਰਦੇ ਨਾਂ, ਇਹਨਾਂ ਵਿੱਚ ਨਾਂ ਕੋਈ ਰਤਾ ਸਚਾਈ,
ਬਚ ਲਉ ਠੇਕੇਦਾਰਾਂ ਤੋਂ, ਇਹਨਾਂ ਨੇਂ ਬੜੀ ਹੈ ਲੁੱਟ ਮਚਾਈ ।

ਫਾਰਮਰ ਦੇ ਨਾਲ ਰਲ ਕੇ, ਆਪਣਿਆਂ ਦਾ ਖੁਨ ਇਹ ਪੀਂਦੇ,
ਅੱਧੇ ਡਾਲਰ ਖਾ ਜਾਂਦੇ, ਬਾਕੀ ਖਿੱਚ ਘੜੀਸ ਕੇ ਦਿੰਦੇ ।
ਦਸ-ਦਸ ਘੰਟੇ ਕੰਮ ਕਰਕੇ, ਬਚਦੀ ਨਾਂ ਕੋਈ ਕੋਲ ਕਮਾਈ,
ਬਚ ਲਉ ਠੇਕੇਦਾਰਾਂ ਤੋਂ, ਇਹਨਾਂ ਨੇਂ ਬੜੀ ਹੈ ਲੁੱਟ ਮਚਾਈ ।

ਬੇਈਮਾਨੀ ਦੀ ਆਦਤ ਨਾਂ, ਇਹਨਾਂ ਨੇ ਇੱਥੇ ਆ ਕੇ ਛੱਡੀ,
ਮਿਹਨਤਕਸ਼ ਨੂੰ ਲੁੱਟ-ਲੁੱਟ ਕੇ, ਇਹ ਤਾਂ ਕਰਨ ਕਮਾਈ ਵੱਡੀ ।
ਸੱਜਣ ਠਗ ਦੇ ਵਾਂਗੂੰ ਹੀ, ਇਹ ਵੀ ਕਰਦੇ ਪਾਪ ਕਮਾਈ,
ਬਚ ਲਉ ਠੇਕੇਦਾਰਾਂ ਤੋਂ, ਇਹਨਾਂ ਨੇਂ ਬੜੀ ਹੈ ਲੁੱਟ ਮਚਾਈ ।

ਬੇਈਮਾਨੀ ਬੰਦ ਹੋਵੇ, ਸੱਚੀ ਗੱਲ ‘ਡੇਵਟ ਹੈ ਕਹਿੰਦਾ,
ਦੁੱਖ ਆਪਣਾ ਸਹਿ ਲੈਂਦਾ, ਨਹੀਂ ਹੋਰ ਕਿਸੇ ਦਾ ਸਹਿੰਦਾ ।
‘ਮੁਕੇਸ਼ ਦੇ ਨਾਲ ਬੀਤੀ ਹੈ, ਇਹ ਨਾਂ ਕਰਦਾ ਸੁਣਾਈ,
ਬਚ ਲਉ ਠੇਕੇਦਾਰਾਂ ਤੋਂ, ਇਹਨਾਂ ਨੇਂ ਬੜੀ ਹੈ ਲੁੱਟ ਮਚਾਈ ।

ਹਫਤੇ ਦੇ ਦਿਨ ਬਾਲ ਗੀਤ

ਸੋਮਵਾਰ ਨੂੰ ਜਾਉ ਬਜਾਰ,
ਖਾਉ ਕੇਲੇ ਸੇਬ ਅਨਾਰ ।

ਮੰਗਲਵਾਰ ਨੂੰ ਕਰੋ ਪੜ੍ਹਾਈ,
ਆਪਸ ਵਿੱਚ ਨਾਂ ਕਰੋ ਲੜਾਈ ।
ਬੁੱਧਵਾਰ ਨੂੰ ਕਰੋ ਇਸ਼ਨਾਨ,
ਮਾਲਸ਼ ਕਰ ਵਧਾਉ ਜਾਨ ।

ਵੀਰਵਾਰ ਨੂੰ ਸੈਰ ਨੂੰ ਜਾਉ,
ਖੁੱਲ੍ਹੇ ਪਾਣੀ ਨਾਲ ਨਹਾਉ ।

ਸ਼ਨੀਵਾਰ ਨੂੰ ਮੰਦਰ ਜਾਉ,
ਤੇਲ ਸਰੋਂ ਦਾ ਦੀਪ ਜਲਾਉ।

ਐਤਵਾਰ ਨੂੰ ਖੇਲੋ ਖੇਲ,
ਕਦੇ ਨਾਂ ਹੋਵੋਗੇ ਤੁਸੀਂ ਫੇਲ ।

ਭਾਈ ਮਤੀ ਦਾਸ

ਯਾਦ ਕਰਾਂ ਅੱਜ ਮਤੀ ਦਾਸ ਤੇਰੀ ਕੁਰਬਾਨੀ,
ਧਰਮ ਦੀ ਖਾਤਰ ਵਾਰ ਦਿੱਤੀ ਆਪਣੀ ਜਿੰਦਗਾਨੀ।

ਆਰੇ ਦੇ ਨਾਲ਼ ਆਪਣਾ ਤੂੰ ਤਨ ਚਰਾਇਆ,
ਮਰਦੇ ਦਮ ਤੱਕ ਗੁਰੁ ਜੀ ਦਾ ਸਾਥ ਨਿਭਾਇਆ।
ਸ਼ਹਾਦਤ ਤੇਰੀ ਦੁਨੀਆਂ ਵਿੱਚ ਹੈ ਲਾਸਾਨੀ,
ਯਾਦ ਕਰਾਂ ਅੱਜ ਮਤੀ ਦਾਸ ਤੇਰੀ ਕੁਰਬਾਨੀ।

ਆਰਾ ਚੱਲਦੇ ਤੇ ਵੀ ਤੂੰ ਨਾ ਘਬਰਾਇਆ,
ਸੀ ਨਾਂ ਕੀਤੀ ਸਤਿਨਾਮੁ ਮੁੱਖੋਂ ਫਰਮਾਇਆ।
ਚੱਲਣ ਦਿੱਤੀ ਜ਼ਾਬਰ ਦੀ ਤੂੰ ਨਾਂ ਸ਼ੈਤਾਨੀ,
ਯਾਦ ਕਰਾਂ ਅੱਜ ਮਤੀ ਦਾਸ ਤੇਰੀ ਕੁਰਬਾਨੀ।

ਧਰਮ ਨਹੀਂ ਤੂੰ ਹਾਰਿਆ ਪਰ ਜਾਨ ਤੂੰ ਵਾਰੀ,
ਦੌਲਤ ਤੈਨੂੰ ਪਿਆਰੀ ਨਹੀਂ ਪਰ ਸਿੱਖੀ ਪਿਆਰੀ।
ਤੇਰੇ ਜਿਹਾ ਨਾਂ ਕੋਈ ਵੀ ਇਸ ਜੱਗ ਤੇ ਸਾਨੀ,
ਯਾਦ ਕਰਾਂ ਅੱਜ ਮਤੀ ਦਾਸ ਤੇਰੀ ਕੁਰਬਾਨੀ।

‘ਡੇਵਟ ਕਰਦਾ ਯਾਦ ਪਿਆ ਤੇਰਾ ਗੀਤ ਇਹ ਗਾਕੇ,
ਜਾਨ ਆਪਣੀ ਵਾਰ ਦਿੱਤੀ ਤੂੰ ਦਿੱਲੀ ਜਾਕੇ ।
ਖੂਨ ਤੇਰਾ ਸੀ ਡੁੱਲਿਆ ਜਿਵੇਂ ਵਗਦਾ ਪਾਣੀ,
ਯਾਦ ਕਰਾਂ ਅੱਜ ਮਤੀ ਦਾਸ ਤੇਰੀ ਕੁਰਬਾਨੀ।

ਅੰਗਹੀਣ ਦੀ ਫਰਿਆਦ

ਕੀ ਹੋਇਆ ਜੇ ਮੈਂ ਅੰਗਹੀਣ,
ਐਪਰ ਨਈਂ ਹਾਂ ਬੁੱਧੀਹੀਣ।

ਮੇਹਨਤ ਨਾਲ ਪੜ੍ਹਾਉਦਾ ਹਾਂ,
ਰੋਟੀ ਖੁਦ ਕਮਾਉਦਾ ਹਾਂ।
ਮੈਨੂੰ ਵੀ ਦੇ-ਦੇ ਤੂੰ ਜੀਣ,
ਕੀ ਹੋਇਆ ਜੇ ਮੈਂ ਅੰਗਹੀਣ।

ਭੀਖ ਨਹੀਂ ਮੈਂ ਮੰਗਦਾ ਹਾਂ,
ਮੰਗਣ ਤੋਂ ਵੀ ਸੰਗਦਾ ਹਾਂ।
ਕੰਮ ਦੇ ਵਿੱਚ ਹਾਂ ਮੈਂ ਪ੍ਰਵੀਨ,
ਕੀ ਹੋਇਆ ਜੇ ਮੈਂ ਅੰਗਹੀਣ।

ਤਰਸ ਮੇਰੇ ਤੇ ਬੇਸ਼ੱਕ ਕਰ ਨਾਂ,
ਹਿੰਮਤ ਮੇਰੀ ਬੇਸ਼ੱਕ ਜ਼ਰ ਨਾਂ।
ਜ਼ਹਿਰ ਨਾਂ ਦੇ ਪਰ ਮੈਨੂੰ ਪੀਣ,
ਕੀ ਹੋਇਆ ਜੇ ਮੈਂ ਅੰਗਹੀਣ।

‘ਡੇਵਟ ਕਰਦਾ ਮੇਹਨਤ ਪੂਰੀ,
ਰਹਿਣੀ ਨਾਂ ਕੋਈ ਆਸ ਅਧੂਰੀ।
ਨਾਂ ਰਹਿ ਗੁੱਸੇ ਵਿੱਚ ਗਮਗੀਨ,
ਕੀ ਹੋਇਆ ਜੇ ਮੈਂ ਅੰਗਹੀਣ।

ਸਫਾਈ

ਆਉ ਸਾਰੇ ਮਿਲ ਕੇ ਸਫਾਈ ਕਰੀਏ,
ਛੱਪੜਾਂ ਦੇ ਪਾਣੀ ਨੂੰ ਗੰਦਾ ਨਾਂ ਕਰੀਏ।

ਗਲ਼ੀਆਂ ਦੀ ਰੋਜ਼ ਹੈ ਸਫਾਈ ਕਰਨੀ,
ਨਾਲ਼ੀਆਂ ਦੀ ਰੋਜ਼ ਹੈ ਸਫਾਈ ਕਰਨੀ।
ਪੌਦੇ ਲਾ-ਲਾ ਆਉ ਧਰਤੀ ਨੂੰ ਭਰੀਏ,
ਆਉ ਸਾਰੇ ਮਿਲ ਕੇ ਸਫਾਈ ਕਰੀਏ,

ਗੰਦਗੀ ਨੂੰ ਗਲ਼ੀਆਂ ‘ਚ ਨਾਂ ਖਲਾਰੀਏ,
ਡੀ.ਡੀ.ਟੀ. ਛਿੜਕ ਮੱਛਰਾਂ ਨੂੰ ਮਾਰਏ।
ਡਾਕਟਰਾਂ ਦੀ ਬੰਦ ਹੈ ਕਮਾਈ ਕਰੀਏ,
ਆਉ ਸਾਰੇ ਮਿਲ ਕੇ ਸਫਾਈ ਕਰੀਏ,

ਜੇ ਤੁਸੀਂ ਸਿਹਤਾਂ ਹਨ ਨੇ ਬਚਾਉਣੀਆਂ,
ਸਕੂਟਰ ਕਾਰਾਂ ਬੰਦ ਕਰ ਦਿਉ ਚਲਾਉਣੀਆਂ।
ਸਾਈਕਲਾਂ ਦੀ ਨਿੱਤ ਹੈ ਚਲਾਈ ਕਰੀਏ,
ਆਉ ਸਾਰੇ ਮਿਲ ਕੇ ਸਫਾਈ ਕਰੀਏ,

ਸਫਾਈ ਚੰਗੀ ਸਿਹਤ ਲਈ ਬੜੀ ਜ਼ਰੂਰੀ ਏ,
ਬਿਮਾਰੀਆਂ ਦੀ ਰੱਖਦੀ ਸਾਡੇ ਤੋਂ ਦੂਰੀ ਏ।
‘ਡੇਵਟ ਦੀ ਗੱਲ ਆਉ ਯਾਦ ਕਰੀਏ,
ਆਉ ਸਾਰੇ ਮਿਲ ਕੇ ਸਫਾਈ ਕਰੀਏ,

ਪ੍ਰਦੇਸੋਂ ਚਿੱਠੀ

ਵਿੱਚ ਪ੍ਰਦੇਸੋਂ ਚਿੱਠੀ ਆਈ,
ਪੁੱਤ ਨੇਂ ਲਿਖਿਆ ਹਾਲ।
ਮਾਏਂ ਮੇਰੀਏ………..,
ਸਾਡਾ ਇੱਥੇ ਮੰਦੜਾ ਹਾਲ।

ਸਾਰਾ ਦਿਨ ਮਜ਼ਦੂਰੀ ਕਰਦੇ,
ਖੇਤਾਂ ਦੇ ਵਿੱਚ ਟੁੱਟ ਮਰਦੇ।
ਹੋ ਗਿਆ ਏ ਪੂਰਾ ਇੱਕ ਸਾਲ,
ਮਾਏਂ ਮੇਰੀਏ……………,
ਸਾਡਾ ਇੱਥੇ ਮੰਦੜਾ ਹਾਲ।

ਯਾਦ ਤੇਰੀ ਮਾਂ ਬਹੁਤ ਸਤਾਵੇ,
ਮੁੜ-ਮੁੜ ਪਿੰਡ ਦਾ ਚੇਤਾ ਆਵੇ।
ਖੇਡਦੇ ਸੀ ਮਿੱਤਰਾਂ ਦੇ ਨਾਲ,
ਮਾਏਂ ਮੇਰੀਏ………….,
ਸਾਡਾ ਇੱਥੇ ਮੰਦੜਾ ਹਾਲ।

ਯਾਦ ਆਵੇ ਤੇਰੇ ਹੱਥ ਦੀ ਰੋਟੀ,
ਪੰਜ ਕਲਿਆਣੀ ਮੰਗੋ ਝੋਟੀ।
ਭੁੱਲਦਾ ਨੀਂ ਪਿੰਡ ਵਾਲ਼ਾ ਤਾਲ,
ਮਾਏਂ ਮੇਰੀਏ……………,
ਸਾਡਾ ਇੱਥੇ ਮੰਦੜਾ ਹਾਲ।

ਭੁੱਲਦਾ ਨਈਂ ਉਹ ਬੋਹੜ ਪੁਰਾਣਾ,
ਖਿੱਲੀਆਂ ਪਾਉਦਾ ਨੱਥੂ ਕਾਣਾ।
ਭੁੱਲਦਾ ਨੀਂ ‘ਡੇਵਟ ਦਾ ਹਾਣ,
ਮਾਏਂ ਮੇਰੀਏ……………,
ਸਾਡਾ ਇੱਥੇ ਮੰਦੜਾ ਹਾਲ।

ਨਸ਼ਿਆਂ ਦੇ ਨੇੜੇ

ਨਸ਼ਿਆਂ ਦੇ ਨੇੜੇ, ਨਾਂ ਜਾਉ ਸਾਥੀਉ,
ਦੁਸ਼ਮਣ ਇਹ ਸਾਡੇ, ਬਚ ਜਾਉ ਸਾਥੀਉ।

ਨਸ਼ੇ ਕਰ ਦਿੰਦੇ, ਸਿਹਤ ਬਰਬਾਦ ਨੇ,
ਭੁੱਲ ਜਾਂਦਾ ਸੱਭ, ਨਸ਼ੇ ਰਹਿੰਦੇ ਯਾਦ ਨੇ।
ਇਹਨਾਂ ਦਾ ਨਾਂ ਫਾਹਾ, ਗਲ਼ ਪਾਉ ਸਾਥੀਉ,
ਦੁਸ਼ਮਣ ਇਹ ਸਾਡੇ, ਬਚ ਜਾਉ ਸਾਥੀਉ।

ਨਸ਼ੇ ਜਿਹੜੇ ਘਰ, ਵਿਚ ਆ ਜਾਂਦੇ ਨੇ,
ਬਣ ਦੈਂਤ ਸੱਭ, ਕੁੱਝ ਖਾ ਜਾਂਦੇ ਨੇ।
ਖਾਣਾ ਹੈ ਤਾਂ ਦੁੱਧ, ਘਿਉ ਖਾਉ ਸਾਥੀਉ,
ਦੁਸ਼ਮਣ ਇਹ ਸਾਡੇ, ਬਚ ਜਾਉ ਸਾਥੀਉ।

‘ਫੀਮ ਡੋਡੇ ਭੰਗ, ਚਾਹੇ ਹੋਵੇ ਜਰਦਾ,
ਖਾਣ ਵਾਲਾ ਬੰਦਾ, ਤਿੱਲ-ਤਿੱਲ ਮਰਦਾ।
ਦਾਰੂ ਦਾ ਨਾਂ ਰੋਗ, ਲਗਾਉ ਸਾਥੀਉ,
ਦੁਸ਼ਮਣ ਇਹ ਸਾਡੇ, ਬਚ ਜਾਉ ਸਾਥੀਉ।

ਭੁੱਲ ਕੇ ਇਹਨਾਂ ਨੂੰ, ਕਦੇ ਮੂੰਹ ਲਾਇਉ ਨਾਂ,
ਖਾਉ ਸੱਭ ਕੁੱਝ, ਪਰ ਨਸ਼ੇ ਖਾਇਉ ਨਾਂ।
ਸੱਭ ਨੂੰ ਇਹ ਗੱਲ, ਸਮਝਾਉ ਸਾਥੀਉ,
ਦੁਸ਼ਮਣ ਇਹ ਸਾਡੇ, ਬਚ ਜਾਉ ਸਾਥੀਉ।

‘ਡੇਵਟ ਦੀ ਗੱਲ, ਸਦਾ ਯਾਦ ਰੱਖਿਉ,
ਹਰ ਵੇਲੇ ਸਿਹਤ, ਦਾ ਖਿਆਲ ਰੱਖਿਉ।
ਕਿਰਤ ਕਮਾਈ, ਵੰਡ ਖਾਉ ਸਾਥੀਉ,
ਦੁਸ਼ਮਣ ਇਹ ਸਾਡੇ, ਬਚ ਜਾਉ ਸਾਥੀਉ।

ਭੈਣ ਦੀ ਪੁਕਾਰ

ਵੀਰ ਨੂੰ ਭੈਣ ਦੀ ਪੁਕਾਰ
ਰੱਖੜੀ ਦਾ ਦਿਨ ਵੀ ਜਦ ਆਵੇ,
ਵੀਰਾ ਤੇਰੀ ਯਾਦ ਸਤਾਵੇ।

ਸੱਭ ਭੈਣਾ ਨੂੰ ਮਿਲਦੇ ਵੀਰੇ,
ਭੈਣਾ ਦੇ ਇਹ ਹੁੰਦੇ ਹੀਰੇ॥

ਚਾਈਂ-ਚਾਈਂ ਭੈਣਾ ਰੱਖੜੀ ਬੱਨ੍ਹਣ,
ਵੀਰਾਂ ਦੀ ਹਰ ਸੁੱਖ ਇਹ ਮੰਗਣ।

ਤੂੰ ਵੀ ਵੀਰਾ ਕਿਤਿਉਂ ਆਜਾ,
ਭੈਣ ਦੇ ਕੋਲੋਂ ਰੱਖੜੀ ਬਨ੍ਹਾਜਾ॥

ਇਹ ਠੇਕੇਦਾਰ

ਇਹ ਠੇਕੇਦਾਰ ਨਿਰਾਲੇ,
ਮੂੰਹੋਂ ਮਿੱਠੇ ਤੇ ਦਿਲ ਦੇ ਕਾਲੇ,
ਕਿ ਲੁੱਟ ਲਿਆ ਜਾਲਮਾਂ ਨੇ-2
ਇਹ ਠੇਕੇਦਾਰ ਨਿਰਾਲੇ ।

ਇਹ ਕਾਲੇ ਦਿਲ ਦੇ ਕਾਲੇ,
ਸਾਡਾ ਖੁਨ ਇਹ ਚੂਸਣ ਵਾਲੇ,
ਕਿ ਨੱਥ ਸਾਥੋਂ ਪੈਂਦੀ ਨਾਂ-2
ਇਹ ਠੇਕੇਦਾਰ ਨਿਰਾਲੇ ।

ਇਹ ਮਿਰਚਾਂ ਮਿੱਠੀਆਂ ਮਿਰਚਾਂ,
ਸਾਨੂੰ ਨੋਚ ਲਿਆ ਇਹਨਾਂ ਗਿਰਝਾਂ,
ਕਿ ਮਾਸ ਸਾਡੇ ਬਚਿਆ ਨਾ-2
ਇਹ ਠੇਕੇਦਾਰ ਨਿਰਾਲੇ ।

ਇਹ ਟੋਲੇ ਲੋਟੂ ਟੋਲੇ,
ਕਦੇ ਕੋਈ ਤਾਂ ਇਹਨਾਂ ਨੂੰ ਬੋਲੇ,
ਕਿ ਮੂੰਹ ਸੱਭ ਬੰਦ ਕਰਿਆ-2
ਇਹ ਠੇਕੇਦਾਰ ਨਿਰਾਲੇ ।

ਇਹ ਜੋਕਾਂ ਲੱਗ ਗਈਆਂ ਜੋਕਾਂ,
ਕਿਵੇਂ ਲੱਗਣੋਂ ਇਹਨਾਂ ਨੂੰ ਰੋਕਾਂ,
ਕਿ ਪੇਸ਼ ਕੋਈ ਜਾਵੇ ਨਾਂ-2
ਇਹ ਠੇਕੇਦਾਰ ਨਿਰਾਲੇ ।

ਇਹ ਡਾਕੂ ਜਾਲਮ ਡਾਕੂ,
ਹੁਣ ‘ਡੇਵਟ ਇਹਨਾਂ ਨੂੰ ਠਾਕੂ,
ਜਬਾਨ ਸਾਨੂੰ ਖੋਲ੍ਹਣੀ ਪਊ-2
ਇਹ ਠੇਕੇਦਾਰ ਨਿਰਾਲੇ ।

ਘਰ ਦਾ ਰਖਵਾਲਾ

ਜਦ ਕੋਈ ਘਰ ਦਾ ਕੋਲ਼ ਨੂੰ ਆਵੇ,
ਦੇਖ ਕੇ ਉਹਨੂੰ ਪੂੰਛ ਹਿਲਾਵੇ ।
ਲੱਤਾਂ ਉੱਤੇ ਚੜ੍ਹ-ਚੜ੍ਹ ਜਾਵੇ,
ਪਤਾ ਨਾਂ ਲੱਗੇ ਕੀ ਸਮਝਾਵੇ ।

ਦਰਵਾਜ਼ੇ ਤੇ ਬੈਠਾ ਰਹਿੰਦਾ ਉਹ,
ਰਸੋਈ ‘ਚ ਪੈਰ ਨਾਂ ਪਾਵੇ ਉਹ ।
ਦੁੱਧ ਮਲਾਈਆਂ ਖਾਵੇ ਉਹ,
ਤਕੜਾ ਹੁੰਦਾ ਜਾਵੇ ਉਹ ।

ਉਪਰੇ ਬੰਦੇ ਨੂੰ ਵੜਨ ਨਾਂ ਦੇਵੇ,
ਪੈਰ ਅੰਦਰ ਉਹਨੂੰ ਧਰਨ ਨਾਂ ਦੇਵੇ ।
ਘਰ ਦਾ ਹੈ ਰਖਵਾਲਾ ਉਹ,
ਬੁੱਝੋ ! ਕੌਣ ਹੈ ਕਿਸਮਤ ਵਾਲਾ ਉਹ ।

ਵਾਤਾਵਰਨ ਦੀ

ਵਾਤਾਵਰਨ ਦੀ ਰੱਖਿਉ ਸਫਾਈ ਬੱਚਿਉ,
ਵਾਰ-ਵਾਰ ਦੇ ਰਿਹਾ ਦੁਹਾਈ ਬੱਚਿਉ ।

ਘਰ ‘ਚ ਕਦੇ ਵੀ ਤੁਸੀਂ ਗੰਦ ਪਾਉਣਾ ਨਹੀਂ,
ਟੈਲੀਫੋਨ ਕਰ ਬਿਮਾਰੀ ਨੂੰ ਬੁਲਾਉਣਾ ਨਹੀਂ ।
ਇਸੇ ‘ਚ ਤੁਹਾਡੀ ਹੈ ਭਲਾਈ ਬੱਚਿਉੋ,
ਵਾਰ-ਵਾਰ ਦੇ ਰਿਹਾ ਦੁਹਾਈ ਬੱਚਿਉ ।

ਗਲ਼ੀਆਂ ‘ਚ ਗੰਦਗੀ ਦੇ ਢੇਰ ਲਾਉਣੇ ਨਹੀਂ,
ਬਿਮਾਰੀ ਦੇ ਕਿਟਾਣੂ ਤੁਸਾਂ ਨੇ ਫਲਾਉਣੇ ਨਹੀਂ ।
ਨਿੱਤ ਰੱਖੋ ਗਲ਼ੀ ਦੀ ਸਫਾਈ ਬੱਚਿਉੋ,
ਵਾਰ-ਵਾਰ ਦੇ ਰਿਹਾ ਦੁਹਾਈ ਬੱਚਿਉ ।

ਨਾਲ਼ੀਆਂ ਨੂੰ ਤੁਸੀਂ ਸਦਾ ਰੱਖੋ ਸਾਫ ਜੀ,
ਕੋਈ ਵੀ ਬਿਮਾਰੀ ਆਵੇਗੀ ਨਹੀਂ ਪਾਸ ਜੀ ।
ਇਹੀ ਤੁਹਾਡੀ ਨੇਕ ਕਮਾਈ ਬੱਚਿਉੋ,
ਵਾਰ-ਵਾਰ ਦੇ ਰਿਹਾ ਦੁਹਾਈ ਬੱਚਿਉ ।

ਪਾਣੀ ਕਦੇ ਕਿਤੇ ਵੀ ਖੜ੍ਹਨ ਦੇਣਾ ਨਹੀਂ,
ਘਰ ‘ਚ ਮਲੇਰੀਆ ਵੜਨ ਦੇਣਾ ਨਹੀ ।
ਬੰਦ ਕਰੋ ਡਾਕਟਰਾਂ ਦੀ ਕਮਾਈ ਬੱਚਿਉ,
ਵਾਰ-ਵਾਰ ਦੇ ਰਿਹਾ ਦੁਹਾਈ ਬੱਚਿਉ ।

ਖੇਤਾਂ ‘ਚ ਪਰਾਲੀ ਨੂੰ ਤੁਸੀਂ ਅੱਗ ਲਾਉਣੀ ਨਹੀਂ,
ਹਵਾ ਵਿੱਚੋਂ ਆਕਸੀਜ਼ਨ ਤੁਸਾਂ ਨੇ ਘਟਾਉਣੀ ਨਹੀਂ ।
ਕਰੋ ਇਹਦੀ ਖੇਤਾਂ ‘ਚ ਗਲ਼ਾਈ ਬੱਚਿਉੋ,
ਵਾਰ-ਵਾਰ ਦੇ ਰਿਹਾ ਦੁਹਾਈ ਬੱਚਿਉੋ ।

ਪਲਾਸਟਿਕ ਦੇ ਲਿਫਾਫੇ ਢੇਰਾਂ ਤੇ ਨਾਂ ਖਿਲਾਰਿਉ,
ਆਪਣੀ ਜ਼ਮੀਨ ਖੁਦ ਨਾਂ ਵਿਗਾੜਿਉ ।
ਨਹੀਂ ਤਾਂ ਸਮਝੋ ਜ਼ਮੀਨ ਗਵਾਈ ਬੱਚਿਉੋ,
ਵਾਰ-ਵਾਰ ਦੇ ਰਿਹਾ ਦੁਹਾਈ ਬੱਚਿਉ ।

ਫਾਲਤੂ ਲਿਫਾਫੇ ਰੱਖੋ ਢੋਲ ਵਿੱਚ ਪਾਕੇ,
ਕਬਾੜੀਏ ਨੂੰ ਵੇਚ ਆਉ ਸ਼ਹਿਰ ਵਿੱਚ ਜਾਕੇ ।
ਨਾਲ਼ੇ ਰਹੂ ਘਰ ਦੀ ਸਫਾਈ ਬੱਚਿਉੋ,
ਵਾਰ-ਵਾਰ ਦੇ ਰਿਹਾ ਦੁਹਾਈ ਬੱਚਿਉ ।

ਦਰਖ਼ਤ ਕਦੇ ਕਿਸੇ ਨੂੰ ਵੱਢਣ ਨਹੀਂ ਦੇਣਾ,
ਨਹੀਂ ਤਾਂ ਔਖਾ ਹੋ ਜਾਵੇਗਾ ਸਾਹ ਲੈਣਾ ।
ਇਹੀ ਗੱਲ ‘ਡੇਵਟ’ ਨੇ ਸਮਝਾਈ ਬੱਚਿਉ,
ਵਾਰ-ਵਾਰ ਦੇ ਰਿਹਾ ਦੁਹਾਈ ਬੱਚਿਉ ।

ਅਣਜੰਮੀਂ ਭੈਣ ਨੂੰ ਪੁਕਾਰ

ਕਿਉਂ ਨਾਂ ਜੰਮੀ ਭੈਣ ਮੇਰੀਏ,
ਰੱਖੜੀ ਮੇਰੇ ਬੰਨਣ ਲਈ।

ਕਿਉਂ ਨਾਂ ਜੰਮੀ ਭੈਣ ਮੇਰੀਏ
ਸ਼ੁੱਭ ਇਛਾਵਾਂ ਮੰਗਣ ਲਈ॥

ਕਿਉਂ ਨਾਂ ਜੰਮੀ ਭੈਣ ਮੇਰੀਏ,
ਸਿਹਰਾ ਮੇਰੇ ਬੰਨਣ ਲਈ।

ਕਿਉਂ ਨਾਂ ਜੰਮੀ ਭੈਣ ਮੇਰੀਏ,
ਹੋਲੀ ਮੇਰੇ ਰੰਗਣ ਲਈ॥

ਕਿਉਂ ਨਾਂ ਜੰਮੀਂ ਭੈਣ ਮੇਰੀਏ,
ਘੋੜੀ ਮੈਨੂੰ ਬਿਠਾਵਣ ਲਈ।

ਕਿਉਂ ਨਾਂ ਜੰਮੀਂ ਭੈਣ ਮੇਰੀਏ,
ਘੋੜੀ ਮੇਰੀ ਗਾਵਣ ਲਈ॥

ਕਿਉਂ ਨਾਂ ਜੰਮੀਂ ਭੈਣ ਮੇਰੀਏ,
ਹੱਥਾਂ ਨੂੰ ਮਹਿੰਦੀ ਰੰਗਣ ਲਈ।

ਕਿਉਂ ਨਾਂ ਜੰਮੀਂ ਭੈਣ ਮੇਰੀਏ
ਰੱਖੜੀ ਮੇਰੇ ਬੰਨਣ ਲਈ॥

SPONSORS

sadapunjab
punjab times news
punjabiwriters
a1_logo_color.jpg
Sikh Sports Club
Nirpal Kaur
Sangeet Darpan
punjab

parhopunjab.gif

LakeStreet Dental

<img id=

siri_guru_granth_sahib-copy.jpg



sadapunjab